ICG
كليات الهندسة الحكومية ولا المعاهد الخاصة ؟
كليات الهندسة الحكومية ولا المعاهد الخاصة ؟

الموضوع ده بتاع معاهد الهندسة الخاصة شاغل تفكير ناس كتير من الدفعات الجديدة خصوصا الناس اللى ربنا موفقهاش و هندسة فرقت معاهم فى التنسيق على حاجة بسيطة جدا !!

كمان كل يوم نشوف خناقات على جروبات هندسة على الفيس بوك .. ده يقولك انت داخل بتتعلم بفلوسك
و التانى يرد عليه احنا الحمامات فى الكلية عندنا انضف من المدرج بتاعكم و الحوار بقى اقل بكتير من مستوى تفكير المهندسين


المهندسين فئة راقية فى تفكيرها فمينفعش ان الحوار بينا يوصل لكدة

مبدئيا اللى بيكتب المقال ده خريج جامعة حكومية و منحاز اكيد للجامعات الحكومية و بتضايق اوى من الناس اللى بتدخل هندسة من 70% و فى الاخر يخرجوا يتعبونا فى الشغل و ممكن بالوسطة ياخدوا اماكن ناس تقدر تفيد بلدها و تفيد مؤسسات كبيرة اكتر من اللى دخل بوسطة و داخل هندسة اصلا ب 70%

لكن فى الناحية التانية متنسوش ان فى ناس زيكم بالظبط كان حلمهم هندسة من وقت ما كانوا صغيرين و عاشوا يحلموا بالكلية دى و فرقت معاهم فى الاخر على درجة واحدة ... لا مش واحد فى المية دى درجة واحدة بس او نص كمان بيفرق

الناس دى حقهم يدخلوا معاهد هندسة خاصة و لو اهتموا بنفسهم و ربنا كرمهم ممكن يطلع مهندس اقوى بكتير من بتاع الحكومة

الفكرة فى المهندس القوى هى انت هتشتغل ازاى على نفسك و تبنى فيها علشان تبقى مهندس يشرف
او علشان تبقى مهندس ليك اسمك فى السوق مع الوقت و الشركات هى اللى تدور عليك مش العكس

الموضوع بيعتمد على الكورسات اللى بتاخدها سواء فى الكلية او برا الكلية
بيعتمد كمان على تحصيلك و ال Self study من على الانترنت و المواقع المشهورة جدا اللى بتلاقى عليها كورسات فى جميع المجالات

فى الاخر الفكرة فيك انت عايز ايه و هتعمل ايه علشان توصل للى انت عايزه فى الكلية الحكومية او المعهد الخاص

هنكمل كلام عن المعاهد الخاصة و احسن المعاهد فى مواضيع جاية لكن مبدئيا فى الموضوع ده هتلاقى المعاهد اللى معتمدة من نقابة المهندسين اوعى تفكر تدخل اى معهد مش متسجل فى النقابة 

التعليقات

    لا توجد تعليقات حتى الان

اترك تعليق