ICG
ازاى تقدر تحصل على وظيفة بعد التخرج
ازاى تقدر تحصل على وظيفة بعد التخرج

خطوات إنك تجيب تدريب صيفى (لو كنت طالب) ووظيفة (لو كنت خريج) فى شركة Multinational أو أى شركة كبيرة (بإعتبار إن عندك كل الSkills اللى بيدوروا عليها من لغة ومهارات شخصية وCV قوى وغيره) :

1)الواسطة 

يكون حد من قرايبك ولا نسايبك شغال فيها أو يعرف حد شغال فيها ويجيبلك فرصة هناك و ده احنا ملناش دعوة بيه

2)الNetworking
شبكة العلاقات بتاعتك أنت سواء أصحابك أو ناس أتعرفت عليهم من ال Facebook أو قابلتهم فى إيفنت معين وضربتوا مع بعض صحوبية .. المهم إن الناس دى يعرفوا إنك شاطر فى مجال معين وهيعملولك Recommendation عشان تاخد الفرصة دى عشان شافوا إنك تستحقها 
ولو الفرصة دى وظيفة فهما هيساعدوك تعدى من مرحلة الFilteration وأنت وشطارتك بقى فى الInterview 

3)موقع الشركة نفسه 
حدد الشركات اللى أنت مستهدفها وإبحث على المواقع بتاعتهم ودور فيهم شوية كدا سواء على قسم خاص بال Training للطلبة أو يكونوا حاطين إيميل وتبعت عليه الCV بتاعك معاه Cover Letter إبن ناس كدا تبينلهم فيه قد إيه إنت حابب الشركة ومهتم جدا بفرصة التدريب فيها ويا سلام لو ضمنت الخطاب دا بمعلومتين جايبهم من الموقع بتاعهم زى مثلا إنهم محققين 10% نمو فى السنة الأخيرة أو أى إنجازات من هذا القبيل .. دا بيبنيلهم إنك مذاكر ومهتم وأنت عارف إن الإهتمام مبيتطلبش 

4) عنوان الشركة
تشوف عنوان الشركات دى وتختار كام شركة فى نفس النطاق وتلبس الحتة اللى على الحبل ومعاك كام نسخة من الCV أو الResume بتاعك وتروحلهم هناك .. وأنت داخل هتلاقى (عمك محمد) البواب دا أكتر واحد هيفيدك فى الشركة حاول تتصاحب عليه وتشربه شاى بالياسمين هيدلك على الشخص المناسب اللى تسلمه الCV بتاعك وإسمه ومكان مكتبه فتروحله وبكل شياكه تسلم عليه وتعرفه بنفسك وتقوله الكلمتين اللى كنت هتكتبهم فى الميل وتبينله قد إيه إنك مهتم ومذاكر الشركة..صدقنى أنا أعرف ناس جابت تدريب فى شركات مبتقبلش غير من AUC و GUC وهما فى معاهد وجامعات حكومية 

5) LinkedIn 
فى موقع لذيذ إسمه LinkedIn هتلاقى عليه كل الشركات الكبيرة إدخل إعملهم Follow عشان تتابع أخبارهم وكمان هيظهرلك الناس اللى شغالة فى الشركة دى إبعت ل10 مثلا ونوع فى الأقسام وخلى الجزء الأعظم من نصيب حبايبنا الHR دول هيساعدوك توصل لحاجات جوا الشركة منها التدريبات والوظايف كمان 

6) Pages
فيه بيدجات كويسة على الفيسبوك بتنزل فرص تدريب ووظايف كتيرة زى Summer training & Jobsوغيرها تابعوهم 

7) Profiles
فى ناس بتنزل على أكونتاتها تدريبات ووظايف حقيقية مش أى كلام تابعوهم برده 
عن نفسى لما بلاقى حاجة تستاهل بنزلها 

8) معارض التوظيف
فى معارض توظيف مشهورة بتتعمل معظمها فى الGreek Campus فى مواعيد معلنة حاول متفوتهاش لأن بينزل فيها شركات كويسة جدا وبتبقى فرصة إنك تشوف جو الشركات دى وتعرف أكتر عن طرق إختيارهم للموظفين أو المتدربين عندهم.

9) Events
لما تلاقى إيفنت على الفيس وجايبين فيه الCEO أو مدير قسم كبير فى شركة إنت عاوز تتدرب فيها دى بالنسبالك علامة يا مارد .. روح الإيفنت وإتعرف على الراجل وحاول تاخد منه Business Card وبرده بينله قد إيه أنك متابع شغل الشركة وعاجبك أسلوب الإدارة وقوله كام إحصائية كدا من اللى إحنا قولنا هنجيبهم من الموقع بتاعهم وإسأله عن فرص التدريب عندهم .. ويا هناك وسعدك لو إداك الميل بتاعه وقالك إبعتلى الCV .. اللى بيحصل بقى لو أنت علمت معاه صح فعلا إنه هيعمل Forward للميل للشخص المسئول من الHR عن الحاجة دى .. الHR هيحس إن الموضوع مهم وإنك إبن خالة المدير دا مثلا ولا تقربله وفى الأغلب هيوافق على طول على طلب التدريب .. ولو وظيفة فى الغالب هيكلموك عشان Interview 

..دى كل الحاجات اللى جت على بالى دلوقتى 
لو حد عنده إضافة يقولها فى كومنت وهزودها فى البوست .. ولو حد جرب طريقة من دول يحكيلنا 

التعليقات

    لا توجد تعليقات حتى الان

اترك تعليق